HENRY JOSEPH ANENA: ASMA" SIWEZI KUCHEZA ULAYA KWA KUWA NIPO ULAYA TU LAAAA..!!!!"!

KILA mchezaji wa Kitanzania hamu yake ni kucheza soka la mafanikio nje ya nchi na hasa Ulaya kwa sababu akicheza huko atakuwa na mafanikio makubwa na uchumi wake utakuwa.

Hiyo ni kutokana na imani kwamba klabu za Ulaya zinalipa wachezaji fedha nyingi tofauti na zile za Tanzania.Henry Joseph Shindika anakubaliana na hilo lakini anabainisha kwamba hawezi kucheza soka Ulaya kwa sifa tu.

Henry nahodha wa zamani wa Simba na Taifa Stars alikuwa anacheza soka ya kulipwa nchini Norway katika klabu ya Kongsvinger aliyoichezea kwa miaka minne kuanzia 2009.

Lakini kwa wakati huu amerudi na kujiunga na Simba, klabu aliyoichezea miaka ya nyuma jambo ambalo limewashtua mashabiki wengi wa soka na wengine wamesikika wakiguna na kutilia shaka kiwango cha Henry.

Katika mahojiano na Mwanaspoti, Henry anaeleza mkasa mzima kuhusu sakata hilo hadi akatua Simba na si timu nyingine yoyote kubwa kwenye ligi kama Yanga au Azam FC.

“Niliporudi hakuna klabu yoyote iliyonihitaji zaidi ya Simba, ndiyo maana nikakubaliana nao na si timu nyingine, hata hivyo ujio wangu hapa ni kuhakikisha Simba inafanya vizuri kwenye ligi na kwa ushirikiano na wachezaji wenzangu waliopo, naamini tutairudishia heshima yake kwa kuchukua ubingwa na vikombe vingine vilivyopo,”anasema.

Henry ametua kuichezea Simba, lakini maswali mengi ya wadau wa soka ni kwa nini amerudi nchini wakati tayari alishapiga hatua kwenye ligi zenye upinzani kama Norway.

“Najua wadau watakuwa na maswali mengi juu yangu kwa nini nimerudi, lakini watambue kuwa sijapenda kurudi Tanzania kirahisi isipokuwa ni mipango, tulishindana kwenye makubaliano kifedha, ndiyo maana nikaona isiwe tabu, nirudi tu nyumbani niangalie mambo mengine,” anasema.

“Kama unavyojua kucheza Ulaya kwa wachezaji kama sisi, makato ya kodi ni makubwa, kwa hiyo siwezi kucheza huko kwa sababu ni Ulaya kwa sifa tu wakati kiuchumi hakuna kitu.”

Henry alienda mbali na kuongeza kuwa kutokana na makato hayo ingekuwa ngumu kwake kuishi huko: “Kuishi Ulaya ni gharama lazima uwe na kazi nzuri inayokuingizia kipato kikubwa kitakachokuwezesha kumudu kodi ambayo ni kubwa sana pamoja na gharama za maisha kwa ujumla ziko juu.”

“Jambo hilo kwangu isingekuwa rahisi kwa haraka haraka sawa na uraia ambao kuupata ni lazima uishi miaka mingi. Kurudi kwangu Simba si kwamba nimekata tamaa, nina malengo mengi sana na mpango wangu ni kutoka tena kwenda Ulaya kikubwa naomba uzima,” Henry anaeleza kwa uchungu na kusisitiza maswali zaidi juu ya kisa chake aulizwe meneja wake aliyemtambulisha kwa jina la Evance Malya.

Akitolea ufafanuzi, Malya anasema: “Unajua hili suala la Henry kurudi Tanzania kubwa walishindindwana kimaslahi. Si kwamba, ameshuka kiwango hapana, kama unavyojua msimu ule uliopita tu alikuwa mchezaji bora kwenye timu isingekuwa jambo rahisi ashuke haraka kihivyo.