WACHEZAJI ERITREA WAPOTEA KENYA

Wachezaji wawili wa timu ya taifa ya soka ya Eritrea, wameripotiwa kutoweka nchini Kenya huku michuano ya CECAFA ikiendelea nchini humo.

Wawili hao wanasemekana huenda wakaomba hifadhi nchini humo.

Sio mara ya kwanza kwa wachezaji wa timu hiyo kupotea wakiwa katika nchi ya kigeni kushiriki michunao ya kikanda. Eritrea ni moja ya nchi zenye ukandamizaji mkubwa wa kisiasa barani Afrika.

Mwezi Disemba mwaka jana, wachezaji 17 wa timu hiyo pamoja na daktari wao waliomba hifadhi nchini Uganda , miezi minane tu baada ya wachezaji wengine 13 kutoka katika klabu moja ya nchi humo kuomba hifadhi nchini Tanzania.

Mwaka 2009,wachezaji wengine wa timu ya taifa ya Eritrea walipotelea nchini Kenya.

''Hili ni jambo la kusikitisha sana kwa tukio kama hili kutokea tena, na inasababisha wasiwasi kwa maafisa wa soka kanda ya Afrika Mashariki na Kati,'' alisema Nicholas Musonye, katibu mkuu wa (Cecafa).

Wachezahi hao wawili, ambao wangali kutajwa, walikosa kurejea katika hoteli yao siku ya Jumamosi baada ya kutizama mechi nyingine.

Mkuu wa haki za binadamu katika Umoja wa Mataifa, Navi Pillay, mwaka jana aliituhumu serikali ya Eritrea kwa kuwaua watu wasio na hatia, mateso na kuwazuilia maelfu ya wafungwa wa kisiasa.

Maelfu ya watu nchini Eritrea, hujaribu kuitoroka nchi hiyo, kila mwaka huku wengi wakifariki katika safari yao bahari kukimbilia ulaya